Bókasafnið - Viskubrunnur

Það er nóg að gera á bókasafni skólans. Nú er yfirstandandi lestrarátak þar sem nemendur lesa sígildu bækurnar um Herramennina og Ungfrúrnar. Fyrir hverja lesna bók fá nemendur mynd af einhverjum fljúgandi furðuhlut til að setja á ævintýravegginn góða, sem þennan veturinn skartar himinhvolfinu með tilheyrandi sólum og plánentum.

5. og 6. bekkur undir leiðsögn umsjónarkennarans, Karitasar Eiðsdóttur, ákvað að taka þetta lestrarátak lengra og eru í óða önn að skrifa nýjar herramanna og ungfrúrbækur og það verður aldeilis spennandi að sjá þeirra afrakstur og aldrei að vita nema það leynist framtíðar metsöluhöfundur í þeirra röðum. Það er því von á nýjum myndskreyttum og skemmtilegum bókum eftir grundfirska höfunda á bókasafnið í jólabókaflóðinu þetta árið. Upplestrardagur rithöfundanna verður auglýstur síðar þegar nær dregur jólum.